CMA ഇന്ത്യ: ആരും അധികം അറിയാത്ത, ഇന്ത്യൻ പാർലമെൻ്റ് പാസാക്കിയ ഒരൊന്നൊന്നര കരിയർ!

 

CMA ഇന്ത്യ: ആരും അധികം അറിയാത്ത, ഇന്ത്യൻ പാർലമെൻ്റ് പാസാക്കിയ ഒരൊന്നൊന്നര കരിയർ!

കഴിഞ്ഞ മൂന്ന് പതിറ്റാണ്ടായി കരിയർ ഗൈഡൻസ് രംഗത്ത് സജീവമായി നിൽക്കുന്ന ഒരാളെന്ന നിലയിൽ, ഒട്ടുമിക്ക ദിവസങ്ങളിലും വിദ്യാർത്ഥികളോടും രക്ഷിതാക്കളോടും സംസാരിക്കാറുണ്ട്. പ്ലസ് ടു കൊമേഴ്‌സ് കഴിഞ്ഞ ഒരു കുട്ടിയോട് അല്ലെങ്കിൽ അവരുടെ രക്ഷിതാവിനോട് "അടുത്തത് എന്താണ് പരിപാടി?" എന്ന് ചോദിച്ചാൽ കിട്ടുന്ന ഉത്തരങ്ങളിൽ വലിയൊരു ശതമാനവും ബി.കോം (B.Com), ബി.ബി.എ (BBA) എന്നീ ഡിഗ്രികളിലൊതുങ്ങും. കുറച്ചുകൂടി വലിയ സ്വപ്നങ്ങളുള്ള, നന്നായി പഠിക്കുന്ന കുട്ടികൾ ചാർട്ടേഡ് അക്കൗണ്ടൻസി (CA) തിരഞ്ഞെടുക്കും. എന്നാൽ ഇതിനിടയിൽ, ഒരുപാട് പേർക്കറിയാത്ത, എന്നാൽ അറിഞ്ഞവർ കൃത്യമായി ഉപയോഗപ്പെടുത്തുന്ന ഒരു ഗംഭീര കരിയർ ഓപ്ഷനുണ്ട്. അതാണ്  CMA (Cost and Management Accountancy).

ഇതൊരു സാധാരണ ഡിഗ്രിയോ, പണം കൊടുത്ത് വാങ്ങാവുന്ന ഒരു സർട്ടിഫിക്കറ്റോ അല്ല. മറിച്ച്, ഇന്ത്യൻ പാർലമെൻ്റ് നേരിട്ട് പാസാക്കിയ നിയമപ്രകാരം പ്രവർത്തിക്കുന്ന, സ്റ്റാറ്റ്യൂട്ടറി പദവിയുള്ള (Statutory Status) ഒരു ഉന്നത പ്രൊഫഷണൽ യോഗ്യതയാണ്. നിർഭാഗ്യവശാൽ, ഈ കോഴ്സിൻ്റെ യഥാർത്ഥ പവർ എത്രത്തോളമുണ്ടെന്ന് നമ്മുടെ നാട്ടിലെ പലർക്കും ഇനിയും മനസ്സിലായിട്ടില്ല.

ഇന്നത്തെ കാലത്ത് കരിയർ ഗൈഡൻസ് എന്നത് പലപ്പോഴും ഒരു കച്ചവടമായി മാറിയിട്ടുണ്ട്. DMIT (Dermatoglyphics Multiple Intelligence Test) പോലെയുള്ള തീർത്തും അശാസ്ത്രീയമായ തട്ടിപ്പ് ടെസ്റ്റുകൾ നടത്തി കുട്ടികളുടെ ഭാവി പ്രവചിക്കാം എന്ന് വിശ്വസിപ്പിക്കുന്ന ഏജൻസികൾക്കിടയിൽ നിന്ന്, യാഥാർത്ഥ്യബോധത്തോടെ ഒരു കരിയറിനെ നോക്കിക്കാണേണ്ടത് അത്യാവശ്യമാണ്. യാതൊരുവിധ മോഹനവാഗ്ദാനങ്ങളും ഇല്ലാതെ, തീർത്തും സത്യസന്ധമായ ഒരു കാഴ്ചപ്പാടിലൂടെ CMA എന്ന പ്രൊഫഷനെ നമുക്കൊന്ന് കീറിമുറിച്ച് പരിശോധിക്കാം.

എന്താണ് ഈ 'സ്റ്റാറ്റ്യൂട്ടറി പദവി' (Statutory Status)?

നമ്മൾ സാധാരണ കേൾക്കുന്ന യൂണിവേഴ്സിറ്റികളെ പോലെയല്ല ഇന്ത്യയിലെ പ്രധാനപ്പെട്ട മൂന്ന് പ്രൊഫഷണൽ അക്കൗണ്ടിംഗ് ബോഡികൾ പ്രവർത്തിക്കുന്നത്. ഇന്ത്യയിൽ സാമ്പത്തിക, കോർപ്പറേറ്റ് മേഖലകളിൽ നിയന്ത്രണാധികാരമുള്ള മൂന്ന് പ്രധാന ഇൻസ്റ്റിറ്റ്യൂട്ടുകളാണുള്ളത്:

1. ICAI (Institute of Chartered Accountants of India) - CA കോഴ്സ് നടത്തുന്നു.

2. ICSI (Institute of Company Secretaries of India) - CS കോഴ്സ് നടത്തുന്നു.

3. ICMAI (Institute of Cost Accountants of India)- CMA കോഴ്സ് നടത്തുന്നു.

ഇവ മൂന്നും ഏതെങ്കിലും സ്വകാര്യ വ്യക്തികളോ ട്രസ്റ്റുകളോ ഉണ്ടാക്കിയതല്ല. റിസർവ് ബാങ്ക് ഓഫ് ഇന്ത്യ (RBI) അല്ലെങ്കിൽ ഇലക്ഷൻ കമ്മീഷൻ ഒക്കെ പ്രവർത്തിക്കുന്നത് പോലെ, ഇന്ത്യൻ പാർലമെൻ്റ് പാസാക്കിയ പ്രത്യേക നിയമങ്ങളുടെ അടിസ്ഥാനത്തിലാണ് ഇവ നിലനിൽക്കുന്നത്. 1959-ലെ കോസ്റ്റ് ആൻഡ് വർക്സ് അക്കൗണ്ടൻ്റ്സ് ആക്ട് (Cost and Works Accountants Act, 1959) പ്രകാരമാണ് ICMAI സ്ഥാപിക്കപ്പെട്ടത്.

അതായത്, നിങ്ങൾ CMA പാസാകുമ്പോൾ നിങ്ങൾക്ക് സർട്ടിഫിക്കറ്റ് തരുന്നത് ഒരു സാധാരണ യൂണിവേഴ്സിറ്റിയല്ല, മറിച്ച് ഇന്ത്യൻ ഗവൺമെൻ്റ് അധികാരപ്പെടുത്തിയ ഒരു സ്റ്റാറ്റ്യൂട്ടറി ബോഡിയാണ്. ഈയൊരു പദവി ഉള്ളതുകൊണ്ട് തന്നെ, ഒരു CMA പ്രൊഫഷണലിന് ഇന്ത്യയിലെ നിയമപ്രകാരം ചില പ്രത്യേക അധികാരങ്ങളുണ്ട്. ഉദാഹരണത്തിന്, കമ്പനി നിയമപ്രകാരം (Companies Act) നിശ്ചിത വിറ്റുവരവുള്ള (Turnover) ഉൽപ്പാദന കമ്പനികൾ അവരുടെ കോസ്റ്റ് ഓഡിറ്റ് (Cost Audit) നിർബന്ധമായും ഒരു കോസ്റ്റ് അക്കൗണ്ടൻ്റിനെക്കൊണ്ട് തന്നെ ചെയ്യിക്കണം. ഈയൊരു നിയമപരമായ പരിരക്ഷ ഉള്ളതുകൊണ്ട് തന്നെ സി.എം.എക്കാരുടെ ഡിമാൻഡ് ഒരിക്കലും ഇല്ലാതാകുന്നില്ല.

CA-യും CMA-യും തമ്മിലുള്ള യഥാർത്ഥ വ്യത്യാസം എന്ത്?

കൊമേഴ്‌സ് വിദ്യാർത്ഥികൾക്കിടയിലെ ഏറ്റവും വലിയ കൺഫ്യൂഷനാണിത്. "രണ്ടും അക്കൗണ്ടിംഗ് അല്ലേ, പിന്നെന്താ വ്യത്യാസം?" വളരെ ലളിതമായ ഒരു ഉദാഹരണത്തിലൂടെ ഇത് പറയാം.

നിങ്ങൾ ഒരു വലിയ മാനുഫാക്ചറിംഗ് കമ്പനി നടത്തുകയാണെന്ന് കരുതുക. ഒരു വർഷം കഴിഞ്ഞ്, നിങ്ങളുടെ കമ്പനി എത്ര രൂപയുടെ സാധനങ്ങൾ വിറ്റു, എത്ര രൂപ ലാഭമുണ്ടാക്കി, എത്ര രൂപ സർക്കാരിന് നികുതി (Tax) അടച്ചു എന്ന് കൃത്യമായി കണക്കുകൂട്ടുകയും, ആ കണക്കുകൾ ശരിയാണെന്ന് സർക്കാരിന് മുന്നിൽ സാക്ഷ്യപ്പെടുത്തുകയും ചെയ്യേണ്ടതുണ്ട്. ഈ സാക്ഷ്യപ്പെടുത്തൽ (Financial & Tax Audit) ചെയ്യാനുള്ള നിയമപരമായ അധികാരം ഒരു CA (Chartered Accountant)-ക്കാണ് ഉള്ളത്. അതായത്, കഴിഞ്ഞുപോയ കാര്യങ്ങളുടെ കൃത്യമായ വിലയിരുത്തലാണിത്. ഒരുതരം 'പോസ്റ്റ്-മോർട്ടം' എന്ന് വേണമെങ്കിൽ പറയാം.

എന്നാൽ, ഒരു CMA (Cost and Management Accountant)-യുടെ റോൾ തുടങ്ങുന്നത് അവിടെയല്ല.

നമുക്ക് നിങ്ങളുടെ കമ്പനിയുടെ കാര്യം തന്നെയെടുക്കാം. അല്ലെങ്കിൽ, ഗതാഗത രംഗത്ത് പ്രവർത്തിക്കുന്ന ഒരു വലിയ ജിപിഎസ് ട്രാക്കിംഗ് (GPS Tracking) അല്ലെങ്കിൽ ഫ്ലീറ്റ് മാനേജ്മെൻ്റ് (Fleet Management) കമ്പനിയാണെന്ന് ചിന്തിക്കുക. ഈ കമ്പനി പുതിയതായി ഒരു സർവീസ് അല്ലെങ്കിൽ പ്രൊഡക്റ്റ് മാർക്കറ്റിൽ ഇറക്കാൻ പോവുകയാണ്.

* ഈ സർവീസ് ഒരു കസ്റ്റമർക്ക് നൽകാൻ കമ്പനിക്ക് എത്ര രൂപ ചിലവാകും?

* അതിൽ ഏതൊക്കെ ചിലവുകൾ വെട്ടിച്ചുരുക്കാൻ കഴിയും?

* മാർക്കറ്റിൽ മറ്റുള്ളവരുമായി മത്സരിക്കാൻ ഈ സർവീസ് എത്ര രൂപയ്ക്ക് വിൽക്കണം?

* അടുത്ത അഞ്ച് വർഷത്തേക്ക് കമ്പനിയുടെ സാമ്പത്തിക സ്ട്രാറ്റജി എന്തായിരിക്കണം?

ഇത്തരം തന്ത്രപ്രധാനമായ തീരുമാനങ്ങൾ (Strategic Decisions) എടുക്കുന്നതാണ് ഒരു CMA പ്രൊഫഷണലിൻ്റെ ജോലി. ഇത് ഭാവിയിലേക്കുള്ള പ്ലാനിംഗാണ്, ഒരു 'പ്രീ-മോർട്ടം' ആണെന്ന് പറയാം. ഒരു ബിസിനസ്സിൻ്റെ നിലനിൽപ്പും ലാഭവും തീരുമാനിക്കുന്നത് അവരുടെ ചിലവുകൾ (Cost) എങ്ങനെ നിയന്ത്രിക്കുന്നു എന്നതിനെ ആശ്രയിച്ചാണ്. അതിനാൽ തന്നെ മാനേജ്മെൻ്റ് തലത്തിൽ ഒരു CMA-യുടെ റോൾ അതിനിർണ്ണായകമാണ്.

ആർക്കൊക്കെ പഠിക്കാം? എപ്പോൾ തുടങ്ങണം?

CMA പഠിക്കാൻ പ്ലസ് ടു കൊമേഴ്‌സ് തന്നെ വേണമെന്ന് യാതൊരു നിർബന്ധവുമില്ല. സയൻസോ ഹ്യുമാനിറ്റീസോ പഠിച്ചവർക്കും ഈ രംഗത്തേക്ക് കടന്നുവരാം. എന്നാൽ കൊമേഴ്‌സ് പഠിച്ചവർക്ക് അക്കൗണ്ടിംഗിൻ്റെ അടിസ്ഥാനം അറിയാവുന്നതുകൊണ്ട് കുറച്ചുകൂടി എളുപ്പമായിരിക്കും എന്ന് മാത്രം.

പ്രധാനമായും രണ്ട് വഴികളിലൂടെയാണ് ഈ കോഴ്‌സിലേക്ക് പ്രവേശനം നേടാൻ കഴിയുക:

1. Foundation Route (പ്ലസ് ടു കഴിഞ്ഞവർക്ക്):

ഏതെങ്കിലും വിഷയത്തിൽ പ്ലസ് ടു (12th Standard) പാസായ വിദ്യാർത്ഥികൾക്ക് CMA ഫൗണ്ടേഷൻ കോഴ്സിൽ രജിസ്റ്റർ ചെയ്യാം. ഇന്ത്യയിൽ വർഷത്തിൽ രണ്ട് തവണ (ജൂൺ, ഡിസംബർ മാസങ്ങളിൽ) ഇതിൻ്റെ പരീക്ഷകൾ നടക്കും. ഫൗണ്ടേഷൻ പാസായാൽ അടുത്ത ഘട്ടമായ ഇൻ്റർമീഡിയറ്റിലേക്ക് കടക്കാം. പത്താം ക്ലാസ്സ് കഴിയുമ്പോൾ തന്നെ നിങ്ങൾക്ക് പ്രൊവിഷണലായി ഇതിൽ രജിസ്റ്റർ ചെയ്ത് പഠനം തുടങ്ങാവുന്നതാണ്.

2. Direct Entry Route (ബിരുദധാരികൾക്ക്):

ഏതെങ്കിലും അംഗീകൃത സർവകലാശാലയിൽ നിന്ന് ബിരുദം (Graduation) ഉള്ളവർക്ക് (ഫൈൻ ആർട്സ് ഒഴികെ) ഫൗണ്ടേഷൻ പരീക്ഷ എഴുതാതെ തന്നെ നേരിട്ട് ഇൻ്റർമീഡിയറ്റ് ഘട്ടത്തിലേക്ക് പ്രവേശനം നേടാം. ബി.കോം, ബി.ബി.എ പോലെയുള്ള കോഴ്സുകൾ കഴിഞ്ഞവർക്ക് ഇത് വളരെ മികച്ച ഒരു ഓപ്ഷനാണ്. കൂടാതെ, എൻജിനീയറിങ് കഴിഞ്ഞ വിദ്യാർത്ഥികൾക്ക് പോലും അവരുടെ മാനേജ്മെൻ്റ് സ്കിൽ വർദ്ധിപ്പിക്കാൻ CMA തിരഞ്ഞെടുക്കാവുന്നതാണ്.

കോഴ്‌സിൻ്റെ ഘടനയും കടമ്പകളും (Syllabus & Structure)

ഒരു സാധാരണ ഡിഗ്രി പോലെ മൂന്ന് വർഷം കോളേജിൽ പോയി പഠിച്ച് സർട്ടിഫിക്കറ്റ് വാങ്ങുന്ന പരിപാടിയല്ലിത്. കഠിനാധ്വാനവും അർപ്പണബോധവും ആവശ്യമായ മൂന്ന് കൃത്യമായ ഘട്ടങ്ങളിലൂടെയാണ് ഒരു വിദ്യാർത്ഥി CMA പ്രൊഫഷണലായി മാറുന്നത്.

1. CMA Foundation (ഫൗണ്ടേഷൻ ലെവൽ)

പ്ലസ് ടു തലത്തിലുള്ള വിഷയങ്ങളാണ് ഇതിൽ പ്രധാനമായും വരുന്നത്. നാല് പേപ്പറുകളാണ് ഫൗണ്ടേഷനിൽ ഉള്ളത്.

* ബിസിനസ്സ് നിയമങ്ങളും ആശയവിനിമയവും (Business Laws and Business Communication)

* ഫിനാൻഷ്യൽ ആൻഡ് കോസ്റ്റ് അക്കൗണ്ടിംഗിൻ്റെ അടിസ്ഥാനങ്ങൾ (Fundamentals of Financial and Cost Accounting)

* ബിസിനസ്സ് കണക്കും സ്റ്റാറ്റിസ്റ്റിക്സും (Business Mathematics and Statistics)

* ബിസിനസ്സ് ഇക്കണോമിക്സും മാനേജ്മെൻ്റും (Business Economics and Management)

പ്ലസ് ടു കൊമേഴ്‌സ് നന്നായി പഠിച്ച, അടിസ്ഥാന വിവരങ്ങളുള്ള ഒരു വിദ്യാർത്ഥിക്ക് അധികം ബുദ്ധിമുട്ടില്ലാതെ പാസാകാൻ കഴിയുന്ന കടമ്പയാണിത്.

2. CMA Intermediate (ഇൻ്റർമീഡിയറ്റ് ലെവൽ)

ഇവിടെയാണ് കോഴ്‌സിൻ്റെ യഥാർത്ഥ കടുപ്പം തുടങ്ങുന്നത്. മൊത്തം എട്ട് പേപ്പറുകളാണ് ഈ ഘട്ടത്തിലുള്ളത്. ഇവയെ നാല് പേപ്പറുകൾ വീതമുള്ള രണ്ട് ഗ്രൂപ്പുകളായി (Group 1 & Group 2) തിരിച്ചിരിക്കുന്നു.

* ഫിനാൻഷ്യൽ അക്കൗണ്ടിംഗ്, ലോ ആൻഡ് എത്തിക്സ്, ഡയറക്ട് ടാക്സേഷൻ (Direct Tax), ഇൻഡയറക്ട് ടാക്സേഷൻ (GST പോലെയുള്ളവ), കോസ്റ്റ് അക്കൗണ്ടിംഗ്, ഓപ്പറേഷൻസ് മാനേജ്‌മെൻ്റ് തുടങ്ങി ബിസിനസ്സ് ലോകത്തെ എല്ലാ നിയമങ്ങളും കണക്കുകളും ഇവിടെ ആഴത്തിൽ പഠിക്കേണ്ടതുണ്ട്.

* നിങ്ങൾക്ക് വേണമെങ്കിൽ രണ്ട് ഗ്രൂപ്പും ഒരുമിച്ച് എഴുതാം, അല്ലെങ്കിൽ ഓരോ ഗ്രൂപ്പായി പഠിച്ചെഴുതാം.

3. Practical Training (പ്രാക്ടിക്കൽ ട്രെയിനിംഗ് അഥവാ ആർട്ടിക്കിൾഷിപ്പ്)

പുസ്തകത്തിലെ അറിവ് മാത്രം പോര, അത് പ്രായോഗികമായി എങ്ങനെ ഉപയോഗിക്കണം എന്ന് പഠിക്കുന്നതാണ് പ്രൊഫഷണൽ കോഴ്സുകളുടെ പ്രത്യേകത. ഇൻ്റർമീഡിയറ്റ് പാസായ ശേഷം (അല്ലെങ്കിൽ ഒരു ഗ്രൂപ്പ് പാസായ ശേഷം) നിർബന്ധമായും 15 മാസത്തെ പ്രാക്ടിക്കൽ ട്രെയിനിംഗ് ചെയ്യണം.

ഏതെങ്കിലും ഒരു പ്രാക്ടീസിംഗ് കോസ്റ്റ് അക്കൗണ്ടൻ്റിൻ്റെ കീഴിലോ, അല്ലെങ്കിൽ ഇൻസ്റ്റിറ്റ്യൂട്ട് അംഗീകരിച്ചിട്ടുള്ള ഏതെങ്കിലും കമ്പനികളിലോ വേണം ഈ ട്രെയിനിംഗ് ചെയ്യാൻ. ഈ കാലയളവിൽ കമ്പനികൾ എങ്ങനെ പ്രവർത്തിക്കുന്നു, ഫയലിംഗ് എങ്ങനെ നടത്തണം, കോസ്റ്റിംഗ് എങ്ങനെ ചെയ്യണം എന്ന് നിങ്ങൾ നേരിട്ട് ചെയ്തു പഠിക്കുന്നു. ഏറ്റവും രസകരമായ കാര്യം, ഈ സമയത്ത് നിങ്ങൾക്ക് അത്യാവശ്യം നല്ലൊരു തുക സ്റ്റൈപ്പൻഡായി (Stipend) ലഭിക്കും എന്നതാണ്. അതായത് പഠിക്കുന്നതിനൊപ്പം തന്നെ സമ്പാദിക്കാനും തുടങ്ങാം.

4. CMA Final (ഫൈനൽ ലെവൽ)

ഏറ്റവും അവസാനത്തെതും കടുപ്പമേറിയതുമായ ഘട്ടമാണിത്. ഇൻ്റർമീഡിയറ്റ് പോലെ തന്നെ ഇവിടെയും എട്ട് പേപ്പറുകളുണ്ട് (രണ്ട് ഗ്രൂപ്പുകൾ).

* കോർപ്പറേറ്റ് ഫിനാൻഷ്യൽ റിപ്പോർട്ടിംഗ്, സ്ട്രാറ്റജിക് ഫിനാൻഷ്യൽ മാനേജ്‌മെൻ്റ്, കോസ്റ്റ് ആൻഡ് മാനേജ്‌മെൻ്റ് ഓഡിറ്റ് തുടങ്ങി തികച്ചും അഡ്വാൻസ്ഡ് ആയ വിഷയങ്ങളാണ് ഇതിൽ പഠിക്കാനുള്ളത്.

ഒരു കമ്പനിയുടെ സി.ഇ.ഒ (CEO) അല്ലെങ്കിൽ സി.എഫ്.ഒ (CFO) തലത്തിൽ ചിന്തിക്കാൻ നിങ്ങളെ പ്രാപ്തരാക്കുന്നത് ഈ ഫൈനൽ സിലബസാണ്. ഈ പരീക്ഷകളും പാസായി, നിങ്ങളുടെ 15 മാസത്തെ ട്രെയിനിംഗും വിജയകരമായി പൂർത്തിയാക്കിയാൽ, നിങ്ങൾക്ക് അഭിമാനത്തോടെ പേരിനൊപ്പം 'CMA' എന്ന് ചേർക്കാം. നിങ്ങൾ ഇന്ത്യയിലെ ഒരു അംഗീകൃത കോസ്റ്റ് ആൻഡ് മാനേജ്മെൻ്റ് അക്കൗണ്ടൻ്റ് ആയി മാറി!

എത്ര രൂപ ചിലവാകും? (The Financial Investment)

നമ്മുടെ നാട്ടിൽ ഒരു പ്രൈവറ്റ് കോളേജിൽ മാനേജ്മെൻ്റ് ക്വാട്ടയിൽ ബി.ടെക് അല്ലെങ്കിൽ നഴ്സിംഗ് പഠിക്കാൻ ലക്ഷങ്ങൾ ഡൊണേഷനും ക്യാപ്പിറ്റേഷൻ ഫീസും കൊടുക്കണം. വിദേശത്ത് പോയി പഠിക്കണമെങ്കിൽ പലപ്പോഴും വീടും പറമ്പും പണയം വെക്കേണ്ടി വരും. എന്നാൽ CMA-യുടെ ഏറ്റവും വലിയ ആകർഷണം ഇതിൻ്റെ സാമ്പത്തിക വശമാണ്. ഒരു സാധാരണക്കാരന്, വലിയ സാമ്പത്തിക ചുറ്റുപാടുകൾ ഇല്ലാത്ത ഒരു വിദ്യാർത്ഥിക്ക് പഠിച്ചെടുക്കാൻ കഴിയുന്ന ഏറ്റവും മികച്ച പ്രീമിയം കോഴ്സാണിത്.

ഇൻസ്റ്റിറ്റ്യൂട്ടിലേക്ക് (ICMAI) അടക്കേണ്ട ഫീസ് വളരെ തുച്ഛമാണ്:

ഫൗണ്ടേഷൻ കോഴ്സിന്: ഏകദേശം 6,000 രൂപ.

ഇൻ്റർമീഡിയറ്റ് കോഴ്സിന്: ഏകദേശം 23,100 രൂപ.

ഫൈനൽ കോഴ്സിന്: ഏകദേശം 25,000 രൂപ.

അതായത്, മൂന്ന് ഘട്ടങ്ങളിലേക്കുമായി ഗവൺമെൻ്റ് ഇൻസ്റ്റിറ്റ്യൂട്ടിലേക്ക് അടക്കേണ്ട മൊത്തം ഫീസ് ഏകദേശം 55,000 രൂപയ്ക്ക് താഴെ മാത്രമാണ്! ഇതിൽ നിങ്ങൾക്ക് പഠിക്കാനുള്ള മുഴുവൻ സ്റ്റഡി മെറ്റീരിയലുകളും പുസ്തകങ്ങളും ഇൻസ്റ്റിറ്റ്യൂട്ട് തന്നെ വീട്ടിലെത്തിച്ച് തരും.

ഇനി കോച്ചിംഗിൻ്റെ കാര്യം. നിങ്ങൾക്ക് സ്വന്തമായി ഇരുന്ന് പഠിക്കാൻ കഴിവുണ്ടെങ്കിൽ (Self-study) ഒരു രൂപ പോലും എക്സ്ട്രാ ചിലവില്ല. എന്നാൽ മിക്ക വിദ്യാർത്ഥികൾക്കും ഒരു ഗൈഡൻസ് ആവശ്യമായതിനാൽ അവർ സ്വകാര്യ കോച്ചിംഗ് സെൻ്ററുകളെ ആശ്രയിക്കാറുണ്ട്. മികച്ച കോച്ചിംഗ് സെൻ്ററുകളിൽ പഠിച്ചാൽ പോലും, മൊത്തം കോഴ്സ് തീരാൻ ഒന്നോ ഒന്നരയോ ലക്ഷം രൂപ മാത്രമേ ചിലവ് വരൂ. പ്രാക്ടിക്കൽ ട്രെയിനിംഗ് സമയത്ത് കിട്ടുന്ന സ്റ്റൈപ്പൻഡ് കൂടി കണക്കുകൂട്ടിയാൽ, ഫലത്തിൽ ഈ കോഴ്സ് തീർത്തും സൗജന്യമായി പഠിക്കുന്നതിന് തുല്യമാണ്!

സത്യസന്ധമായ ഒരു വിലയിരുത്തൽ: ഈ കോഴ്സ് എളുപ്പമാണോ?

ഇവിടെയാണ് യാഥാർത്ഥ്യത്തിലേക്ക് നമ്മൾ തിരികെ വരേണ്ടത്. എളുപ്പത്തിൽ പണമുണ്ടാക്കാം എന്ന് മോഹിപ്പിക്കുന്ന പരസ്യങ്ങൾ കണ്ട് ആരും ഈ കോഴ്സിന് ചേരരുത്. CMA എന്നത് തീർച്ചയായും ഒരു എളുപ്പമുള്ള കോഴ്‌സല്ല.

ഒരു സാധാരണ ആർട്സ് & സയൻസ് കോളേജിൽ പോയി, ക്യാമ്പസ് ലൈഫ് ആസ്വദിച്ച്, പരീക്ഷയ്ക്ക് തലേദിവസം രാത്രി മാത്രം നോട്ട്സ് വായിച്ച് പാസാകാൻ കഴിയുന്ന ഒന്നല്ല ഇത്.

പാസ് ശതമാനം (Pass Percentage): ഇൻ്റർമീഡിയറ്റ്, ഫൈനൽ പരീക്ഷകളുടെ പാസ് ശതമാനം പലപ്പോഴും 10% മുതൽ 20% വരെ മാത്രമേ ഉണ്ടാകാറുള്ളൂ. അതായത് പരീക്ഷ എഴുതുന്ന 100 പേരിൽ ശരാശരി 15 പേർ മാത്രമേ പാസാകൂ. ബാക്കി 85 പേരും പരാജയപ്പെടും.

സ്ഥിരോത്സാഹം:ഒരു തവണ പരാജയപ്പെട്ടാൽ, വിഷമിച്ചിരിക്കാതെ അടുത്ത ആറുമാസം കഴിഞ്ഞ് വീണ്ടും എഴുതാനുള്ള മാനസിക കരുത്ത് ഇവിടെ അനിവാര്യമാണ്. പലരും പാതിവഴിയിൽ കോഴ്സ് ഉപേക്ഷിക്കുന്നത് ഈ തോൽവികളെ ഭയന്നാണ്.

ചിട്ടയായ പഠനം: ദിവസവും 8 മുതൽ 10 മണിക്കൂർ വരെ മൊബൈൽ ഫോണും സോഷ്യൽ മീഡിയയും മാറ്റിവെച്ച്, പൂർണ്ണ ശ്രദ്ധയോടെ പഠിക്കാൻ തയ്യാറുള്ളവർക്ക് മാത്രമേ ഈ കോഴ്സ് തിരഞ്ഞെടുക്കാൻ പാടുള്ളൂ.

എന്നാൽ, ഈ കടുപ്പത്തിന് ഒരു മറുപുറവുമുണ്ട്. ഇവിടെ ആർക്കും ലക്ഷങ്ങൾ കോഴ കൊടുത്ത് സീറ്റ് വാങ്ങാൻ കഴിയില്ല. നിങ്ങളുടെ പിതാവ് എത്ര വലിയ കോടീശ്വരനാണെങ്കിലും, നിങ്ങളുടെ ജാതിയോ മതമോ എന്താണെങ്കിലും ഇവിടെ അതൊന്നും ഒരു വിഷയമല്ല. നിങ്ങൾക്ക് ബുദ്ധിയും, അതിനേക്കാളുപരി കഠിനാധ്വാനം ചെയ്യാനുള്ള അർപ്പണബോധവുമുണ്ടെങ്കിൽ, തികച്ചും മെറിറ്റ് അടിസ്ഥാനത്തിൽ നിങ്ങൾക്ക് ഈ പദവി നേടിയെടുക്കാം. ആ പദവിക്ക് സമൂഹത്തിലുള്ള വിലയും വളരെ വലുതായിരിക്കും.

ആർട്ടിഫിഷ്യൽ ഇൻ്റലിജൻസും (AI) CMA-ക്കാരുടെ ഭാവിയും: റോബോട്ടുകൾ ജോലി കവരുമോ?

ന്യൂജെൻ സാങ്കേതികവിദ്യകളായ ആർട്ടിഫിഷ്യൽ ഇൻ്റലിജൻസും (AI), മെഷീൻ ലേണിംഗും, ചാറ്റ് ജിപിടിയുമൊക്കെ (ChatGPT) ലോകം കീഴടക്കുന്ന ഈ കാലത്ത്, ഒട്ടുമിക്ക വിദ്യാർത്ഥികളുടെയും ഒരു പ്രധാന സംശയമാണ് "ഞാൻ ഈ കോഴ്സ് പഠിച്ചിറങ്ങുമ്പോഴേക്കും എൻ്റെ ജോലി AI കൊണ്ടുപോകുമോ?" എന്നത്. പുതിയ കാലത്തെ തൊഴിൽ മേഖലകളെക്കുറിച്ച് പഠിക്കുന്ന ഒരാളെന്ന നിലയിൽ വളരെ വ്യക്തമായി പറയാം: CMA എന്നത് വളരെ സുരക്ഷിതമായ, പൂർണ്ണമായും "AI-Proof" ആയ ഒരു കരിയറാണ്.

എന്തുകൊണ്ടാണ് അങ്ങനെ പറയുന്നത്? AI വരുമ്പോൾ തീർച്ചയായും അക്കൗണ്ടിംഗ് മേഖലയിൽ വലിയ മാറ്റങ്ങൾ വരും. സാധാരണ ഡാറ്റാ എൻട്രി ജോലികൾ, ബുക്ക് കീപ്പിംഗ്, ബില്ലിംഗ് പോലെയുള്ള ആവർത്തന സ്വഭാവമുള്ള (Repetitive) ജോലികൾ സോഫ്റ്റ്‌വെയറുകൾ ഏറ്റെടുക്കും. എന്നാൽ ഒരു CMA പ്രൊഫഷണലിൻ്റെ ജോലി ഡാറ്റ ടൈപ്പ് ചെയ്യുക എന്നതല്ല, മറിച്ച് ഡാറ്റ അനാലിസിസ് (Data Analysis) ആണ്.

ലഭ്യമായ കണക്കുകൾ വെച്ച് കമ്പനിയുടെ ഭാവി എന്തായിരിക്കും, ഒരു പ്രത്യേക പ്രതിസന്ധി ഘട്ടത്തിൽ കമ്പനി എന്ത് തീരുമാനമെടുക്കണം, ബിസിനസ്സ് നയങ്ങൾ എങ്ങനെ രൂപീകരിക്കണം എന്നത് പോലുള്ളവ ഒരു മെഷീനും തനിയെ ചെയ്യാൻ കഴിയില്ല. മനുഷ്യൻ്റെ യുക്തി, ബിസിനസ്സ് ബുദ്ധി, അനുഭവസമ്പത്ത് എന്നിവ അവിടെ ആവശ്യമാണ്.

വാസ്തവത്തിൽ, AI വരുന്നതോടെ CMA പ്രൊഫഷണലുകളുടെ പവർ വർദ്ധിക്കുകയാണ് ചെയ്യുന്നത്. സങ്കീർണ്ണമായ ഡാറ്റകൾ വളരെ വേഗത്തിൽ പ്രോസസ്സ് ചെയ്ത് കിട്ടാൻ AI ടൂളുകൾ സഹായിക്കും. ഈ ടൂളുകൾ ഉപയോഗിക്കാൻ അറിയുന്ന ഒരു കോസ്റ്റ് അക്കൗണ്ടൻ്റിന് ഭാവിയിൽ കോർപ്പറേറ്റ് ലോകത്ത് വമ്പൻ ഡിമാൻഡായിരിക്കും. ടെക്നോളജിയെ ഒരു ഭീഷണിയായല്ല, മറിച്ച് ഒരു ആയുധമായി ഉപയോഗിക്കാൻ അറിയുന്നവരായിരിക്കണം പുതിയ കാലത്തെ CMA പ്രൊഫഷണലുകൾ.

തൊഴിൽ സാധ്യതകൾ, ശമ്പളം, ആഗോള അവസരങ്ങൾ (Career Scope & Global Reach)

CMA പാസായ ഒരാൾക്ക് ഇന്ത്യയിലും വിദേശത്തും നിരവധി അവസരങ്ങളാണുള്ളത്. പ്രധാനമായും താഴെ പറയുന്ന മേഖലകളിലാണ് കൂടുതൽ തൊഴിൽ സാധ്യതകൾ:

1. വൻകിട നിർമ്മാണ കമ്പനികൾ (Manufacturing Sector): ടാറ്റാ മോട്ടോഴ്സ്, റിലയൻസ്, മഹീന്ദ്ര, മാരുതി തുടങ്ങിയ വൻകിട നിർമ്മാണ കമ്പനികളിൽ പ്രൊഡക്ഷൻ കോസ്റ്റ് കൃത്യമായി കാൽക്കുലേറ്റ് ചെയ്യാനും നിയന്ത്രിക്കാനും CMA-ക്കാർക്ക് വലിയ ഡിമാൻഡാണ്.

2. പൊതുമേഖലാ സ്ഥാപനങ്ങൾ (Government & PSUs): സർക്കാർ കമ്പനികളായ ONGC, BHEL, Coal India, KSEB, റെയിൽവേ തുടങ്ങിയവയിൽ കോസ്റ്റ് അക്കൗണ്ടൻ്റുമാർക്കും ഫിനാൻസ് മാനേജർമാർക്കുമായി നിരവധി ഒഴിവുകൾ വരാറുണ്ട്. മികച്ച ശമ്പളത്തിനൊപ്പം സർക്കാർ ജോലിയുടെ സുരക്ഷിതത്വവും ഇവിടെ ലഭിക്കുന്നു.

3. ഐടി, കൺസൾട്ടിംഗ് (IT & Big 4): ബിഗ് ഫോർ (Big 4) എന്ന് വിളിക്കപ്പെടുന്ന EY, KPMG, PwC, Deloitte തുടങ്ങിയ ഭീമൻ കൺസൾട്ടിംഗ് കമ്പനികൾ മാനേജ്‌മെൻ്റ് കൺസൾട്ടൻ്റുമാരായി CMA-ക്കാരെ ക്യാമ്പസ് പ്ലേസ്മെൻ്റിലൂടെ വലിയ ശമ്പളത്തിൽ നിയമിക്കാറുണ്ട്. ഇൻഫോസിസ്, ടിസിഎസ് തുടങ്ങിയ ഐടി കമ്പനികളിലും ഇവർക്ക് അവസരമുണ്ട്.

4. സ്വന്തമായ പ്രാക്ടീസ് (Independent Practice): ആർക്കും കീഴിൽ ജോലി ചെയ്യാൻ താല്പര്യമില്ലാത്തവർക്ക് സ്വന്തമായി ഒരു ഓഫീസ് തുടങ്ങാം. കമ്പനികളുടെ കോസ്റ്റ് ഓഡിറ്റ്, പ്രൊജക്റ്റ് റിപ്പോർട്ട് തയ്യാറാക്കൽ, ജിഎസ്ടി ഫയലിംഗ് എന്നിവ ചെയ്ത് കൊടുത്ത് മികച്ച വരുമാനം ഉണ്ടാക്കാം.

ഗൾഫ് രാജ്യങ്ങളിലെ സാധ്യതകൾ (GCC Opportunities):

യുഎഇ (UAE), ഖത്തർ, സൗദി അറേബ്യ തുടങ്ങി മദ്ധ്യപൂർവ്വേഷ്യൻ രാജ്യങ്ങളിൽ (Middle East) കോർപ്പറേറ്റ് ടാക്സും വാറ്റും (VAT) കർശനമാക്കിയതോടെ അവിടെ മികച്ച ഫിനാൻസ് പ്രൊഫഷണലുകളുടെ ഡിമാൻഡ് കുത്തനെ കൂടിയിട്ടുണ്ട്. ഇന്ത്യയിൽ നിന്നും CMA പാസായ നിരവധി പേരാണ് ഇപ്പോൾ ദുബായിലും അബുദാബിയിലുമൊക്കെ വലിയ കമ്പനികളിൽ ഉന്നത പദവികളിൽ ഇരിക്കുന്നത്.

കൂടാതെ, ICMAI ഇപ്പോൾ ലോകമെമ്പാടുമുള്ള വിവിധ ഇൻസ്റ്റിറ്റ്യൂട്ടുകളുമായി ധാരണാപത്രങ്ങളിൽ (MOU - Memorandum of Understanding) ഒപ്പുവെച്ചിട്ടുണ്ട്. ഉദാഹരണത്തിന്, UK-യിലെ CIMA (Chartered Institute of Management Accountants), അമേരിക്കയിലെ IMA (Institute of Management Accountants) എന്നിവയുമായി ICMAI-ക്ക് ടൈ-അപ്പുകൾ ഉണ്ട്. ഇത് വഴി ഇന്ത്യയിൽ CMA പാസാകുന്ന ഒരാൾക്ക് വളരെ കുറച്ച് പേപ്പറുകൾ മാത്രം അധികമെഴുതി ആഗോള യോഗ്യതകൾ നേടിയെടുക്കാനും, യുകെയിലോ അമേരിക്കയിലോ എളുപ്പത്തിൽ ജോലി കണ്ടെത്താനും സാധിക്കും. ലോകം മുഴുവൻ നിങ്ങളുടെ ക്യാൻവാസ് ആയി മാറുകയാണ്.

*ശമ്പളം (Salary Details):

ശമ്പളത്തിൻ്റെ കാര്യം പറയുമ്പോൾ, അത് വ്യക്തിയുടെ കഴിവ്, കമ്മ്യൂണിക്കേഷൻ സ്കിൽ, ജോലി ചെയ്യുന്ന സ്ഥലം എന്നിവയെ ആശ്രയിച്ചിരിക്കും. എങ്കിലും, ഒരു തുടക്കക്കാരനായ CMA പ്രൊഫഷണലിന് ഇന്ത്യയിൽ ശരാശരി 7 ലക്ഷം മുതൽ 10 ലക്ഷം രൂപ വരെ വാർഷിക ശമ്പളം (Annual Package) ലഭിക്കാറുണ്ട്. ക്യാമ്പസ് ഇൻ്റർവ്യൂകളിൽ ടോപ്പർമാർക്ക് 20 ലക്ഷത്തിന് മുകളിലൊക്കെ പാക്കേജുകൾ ലഭിച്ച ചരിത്രവുമുണ്ട്.

കഴിവ് തെളിയിച്ച് മുന്നോട്ട് പോയാൽ വളരെ പെട്ടെന്ന് തന്നെ കോർപ്പറേറ്റ് കമ്പനികളുടെ ജനറൽ മാനേജർ, ഫിനാൻസ് ഡയറക്ടർ, അല്ലെങ്കിൽ ഏറ്റവും ഉയർന്ന പദവിയായ CFO (Chief Financial Officer) തുടങ്ങിയ സ്ഥാനങ്ങളിൽ എത്താൻ ഇവർക്ക് സാധിക്കും.

പ്രിയപ്പെട്ട വിദ്യാർത്ഥികളോടും രക്ഷിതാക്കളോടും പറയാനുള്ളത് (Final Verdict)

ഏതെങ്കിലും ഡിഗ്രി പഠിച്ച് പുറത്തിറങ്ങി തൊഴിലില്ലായ്മയുടെ കണക്കുകൾ വർദ്ധിപ്പിക്കാതിരിക്കാൻ, കൃത്യമായ പ്ലാനിംഗ് അത്യാവശ്യമാണ്. "CA പാസായില്ലെങ്കിൽ മാത്രം പഠിക്കാനുള്ള ഒരു സെക്കൻഡ് ഓപ്ഷൻ" ആയി CMA-യെ കാണരുത്. ഇതൊരു സ്വതന്ത്രവും അതിശക്തവുമായ പ്രൊഫഷനാണ്.

നിങ്ങൾക്ക് കണക്കുകളോട് താല്പര്യമുണ്ടെങ്കിൽ, ബിസിനസ്സ് ലോകം എങ്ങനെ പ്രവർത്തിക്കുന്നു എന്ന് പഠിക്കാൻ ആഗ്രഹമുണ്ടെങ്കിൽ, കഠിനാധ്വാനം ചെയ്യാൻ തയ്യാറാണെങ്കിൽ, നിങ്ങൾക്ക് ധൈര്യമായി തിരഞ്ഞെടുക്കാവുന്ന ഒന്നാം കിട കരിയർ ഓപ്ഷൻ തന്നെയാണിത്.

ലക്ഷങ്ങൾ ഫീസ് കൊടുത്ത് വിദേശത്ത് പോയി പഠിക്കുന്നതിന് പകരം, നമ്മുടെ നാട്ടിൽ ഇരുന്ന് തന്നെ തുച്ഛമായ ചിലവിൽ പഠിച്ചെടുക്കാൻ കഴിയുന്ന, ലോകം മുഴുവൻ അംഗീകാരമുള്ള ഈ യോഗ്യത തീർച്ചയായും വലിയൊരു വാഗ്ദാനമാണ്. ഡിഗ്രി പഠിക്കാൻ പോകുന്ന പലരും അത് ഫുൾ ടൈം ആയി പഠിക്കുന്നതിനൊപ്പം എക്സ്ട്രാ സമയം കണ്ടെത്തി CMA പഠിച്ച് വൻ വിജയങ്ങൾ നേടുന്നുണ്ട്.

കരിയർ എന്നത് ഒരു ദിവസം കൊണ്ട് സംഭവിക്കുന്ന മാന്ത്രികവിദ്യയല്ല. അത് വർഷങ്ങൾ നീളുന്ന കഠിനാധ്വാനത്തിൻ്റെയും ശരിയായ തീരുമാനങ്ങളുടെയും ആകെത്തുകയാണ്. തെറ്റായ ഗൈഡൻസുകൾക്ക് പിന്നാലെ പോകാതെ, കൃത്യമായ വിവരങ്ങൾ ശേഖരിച്ച്, ഉചിതമായ സമയത്ത് പഠനം തുടങ്ങുക. ഫോക്കസ് നഷ്ടപ്പെടാതെ ലക്ഷ്യത്തിലേക്ക് നടന്നാൽ, ആ മൂന്നക്ഷരങ്ങൾ (CMA) നിങ്ങളുടെ പേരിനൊപ്പം കൂട്ടിച്ചേർക്കാനും, നിങ്ങളുടെയും കുടുംബത്തിൻ്റെയും ഭാവി സുരക്ഷിതമാക്കാനും നിങ്ങൾക്ക് ഉറപ്പായും സാധിക്കും.

✒️എഴുതിയത്: മുജീബുല്ല KM

കരിയർ കോച്ച് & മെൻ്റർ